BUXORO VILOYAT BOLALAR KUTUBXONASINING TARIXI Buxoro viloyat bolalar kutubxonasi Abu Ali Ibn Sino nomidagi viloyat kutubxonasining bolalar bo‘limi negizida 13 ming kitob fondi, 836 kitobxon va 15 nafar kutubxonachi bilan ochilgan. Buxoro viloyat bolalar kutubxonasi 1964 yil 1 iyulida P. Morozov nomi bilan tashkil topgan bo‘lib, 2013 yilgacha o‘tmish arxitekturasining durdonasi bo‘lmish Amir Olimxon madrasasida faoliyat yuritdi. Kutubxona bir necha marta Faxriy Yorliq, diplomlar bilan taqdirlangan. “Qishloqqa madaniy homiylik qilish”, “Tabiat bolalar xayolida” deb nomlangan ko‘rgazmasi diplomlari bilan mukofotlangan. 1973 yilda Buxoro viloyati Mehnat Shuhrati kitobiga kiritilgan. Kutubxona qoshidagi kinostudiyaning “Saxiy kitob podsholigida” kinofilmi uchun faxriy yorliqning sovrindori bo‘ldi. Bundan tashqari kutubxona O‘zbekiston xalq xo‘jaligi ko‘rgazmasining II darajali diplomiga sazovor bo‘lgan. Viloyat axborot-resurs markazi Xalq ta’limi vazirligining 2009 yil 27 fevraldagi “Maktab-kutubxona-oila-jamoat tashkilotlari” xayriya tadbirini o‘tkazish to‘g‘risidagi 43-sonli buyrug‘i ijrosini amalga oshirishda o‘quvchilarni vatanga muhabbat, milliy istiqlol g‘oyalariga sadoqat ruhida ma’naviy axloqiy jihatdan komil inson qilib tarbiyalashga ko‘maklashayotgani, axborot-resurs markazlari fondini adabiyotlar bilan boyitishga qo‘shayotgan hissasi uchun O‘zbekiston Respublikasi Xalq ta’limi vazirligi tomonidan rahmatnoma bildirildi. Axborot kutubxona jarayonida zamonaviy axborot texnologiyalarini joriy etish bo‘yicha O‘zbekiston Respublikasi Prezidentining 2006 yil 20 iyundagi PQ-381-sonli Qaroriga asosan tashkil etilgan viloyat hokimligi xalq ta’limi boshqarmasi tasarrufidagi viloyat Axborot-resurs markazi sifatida faoliyat ko‘rsatdi. Viloyat Bolalar kutubxonasi Xalq ta’lim boshqarmasi tasarrufida bo‘lib, viloyatdagi 13 ta tuman(shahar) dagi 538 ta maktab kutubxonalari, 4 ta maxsus maktab-internatlari uchun uslubiy markaz hisoblanadi. O‘zbekiston Respublikasi Prezidentining 2019 yil 30 sentabrdagi “Xalq ta’limi tizimidagi maktabdan tashqari ta’lim samaradorligini tubdan oshirish chora-tadbirlari to‘g‘risida” gi PQ-4467-sonli qaroriga asosan viloyat bolalar kutubxonasi sifatida faoliyatini davom ettirmoqda.
